PARIBASAN

Unen - unen utawa ungkapan ing jagading basa Jawa ana telung jenis, yaiku paribasan, bebasan, lan saloka. Yen digatekake tetelune mujudake unen - unen kang gumathok lan ajeg panganggone nanging ana bedane. Bedane yaiku :

• Paribasan yaiku , yaiku unen - unen kang ajeg panganggone, mawa teges entar nanging ora ngemu surasa pepindahan.  

Tuladha : 

- Keplok ora tombok, tegese melu seneng nanging ora melu ngetokake wragad

- Dahwen ati open, tegese nacad nanging sejatine duwe milik

- Kuncung nganti gelung, tegese wiwit bocah nganti dewasa

- Nulung menthung, tegese nenulung nanging nyilakakake

- Kadang konang, tegese diaku sedulur merga sugih 

• Bebasan yaiku , unen - unen kang ajeg panganggone, mawa teges entar, ngemu surasa pepindhan sing dipindhakake kaanan utawa sesipatane wong.

Tuladha : 

- Rebut balung tanpa isi, tegese padudon merga barang kang remeh 

- Ngangsu banyu ing kranjang, tegese meguru kang asile ora dicakake

- Ngubak- ubak banyu bening, tegese gawe rusuh ana ing papan kang tentrem

- Wedi rai wani silit, tegese wedi adu arep, wanine mung ana ing mburi

- Emban cindhe emban siladan, tegese ora adil, beda pangrengkuhe

• Saloka yaiku , unen - unen kang ajeg panganggone, mawa teges entar, ngemu surasa pepindhan sing dipindhakake wonge.

Tuladha : 

- Kemladheyan ngajak sempal, tegese kanca kang ngajak marang kasusahan

- Gong lumaku tinabuh, tegese kang kumudu - kudu ditakoni 

- Ula marani gepuk, tegese wong kang marani/ njarag kacilakan 

- Bebek mungsuh mliwis, tegese wong pinter mungsuh wong pinter ning sing siji kalah ubet

- Iwak lumebu ing wuwu, tegese wong kang gampang diapusi